KSHM dënon me forcë kërcënimet me vdekje dërguar në rrjete sociale ndaj gazetares Alice Taylor, njëkohësisht dhe anëtare e Bordit të Aleancës për Media Etike. Këto kërcënime, të bëra nga llogari të rreme në Facebook që mund të vijnë nga individë, kompani, politikanë apo dhe grupime politike të cilët kanë arsye të tremben nga puna e gazetarëve të pavarur, janë shprehje e qartë e klimës së dhunës ndaj medias që ekziston në vend.

Qeveria shqiptare edhe pse nuk mund të mbajë përgjegjësi direkte për kërcënimet nga llogari të rreme në Facebook, duhet të mbajë përgjegjësi për klimën e dhunës ndaj gazetarëve, e cila krijon hapësira për akte të tilla. Kjo klimë mund të shpërndahet vetëm me reagime të forta nga ana e ekzekutivit dhe tërë aktorëve politikë si dhe me akte konkrete për të gjetur fajtorët.

KSHM i bën thirrje autoriteteve shqiptare për të investiguar deri në fund ngjarjen dhe për të zbuluar fajtorët.

KSHM ka ndjekur me shumë shqetësim përshkallëzimin e debatit mbi terminologjinë emërtuese të prindërimit në dokumente zyrtarë.

KSHM vëren që shumë portale, kanë nxituar për të pasqyruar debatin e zhvilluar në 2 televizione, ABC dhe TCH, duke keqcituar përfaqësuesen e komunitetit LGBTI, Xheni Karaj. Ndërsa komuniteti LGBTI kërkon që krahas termave “nënë” e “baba” të shtohen edhe termat “prind 1” dhe “prind 2” çka do të mundësojë që fëmijët e tyre të mund të regjistrohen zyrtarisht, shumë portale e kanë pasqyruar debatin sikur komuniteti LGBT kërkon “heqjen” e fjalëve nënë e baba deri dhe nga fjalori.

KSHM u kërkon portaleve të korigjojnë keq-citimin, për të shmangur nxitjen e gjuhës së mëtejshme të urrejtjes që ka pasuar këtë debat.

KSHM mbështet aktivisten Xheni Karaj dhe lirinë e shprehjes, duke dënuar ashpër çdo lloj mesazhi të dhunshëm e diskriminues ndaj saj, dërguar në mënyrë private ose dhe publike në rrjetet sociale.

KSHM mbështet lirinë e çdo individi për të shprehur lirisht mendimet e veta pro dhe kundër temës në fjalë, por dënon kategorikisht çdo deklaratë apo prononcim që e kthen debatin në agresion, dhunë e diskriminim.

KSHM, këshillon televizionet TCH dhe ABC por dhe portaleve që e kanë pasqyruar ngjarjen, që të moderojnë komentet në youtube apo në rrjetet e tyre sociale, dhe të bllokojnë çdo lloj komenti të dhunshëm ndaj komunitetit LGBT, përfaqësuesve të tyre apo kujtodo që atakohetnë mënyrë agresive vetëm se shpreh një mendim ndryshe.

KSHM mbështet protestën e gazetarëve që po zhvillohet sot për rregulloren e re të Kuvendit të Shqipërisë dhe shpreh shqetësimin e vet për këtë akt të ri në frenim të raportimit të lirë dhe lirisë së informimit.

Vendimi i Parlamentit paraqet disa probleme.

Së pari, mbyllja e gazetarëve në një dhomë që punimet e Kuvendit t’i ndjekin nga TV është absurde, për të mos thënë qesharake. Media duhet të jetë aty ku ngjarja ndodh, në emër të publikut dhe për të informuar publikun. Dhe ngjarja ndodh sidomos në Komisionet Parlamentare, ku me rregulloren e re gazetarët nuk lejohen të jenë prezent. Heqja e kësaj lirie është praktikisht heqje e lirisë për informim të publikut. Ky është defakto ERTV-zim i Parlamentit.
Së dyti, krijimi i diskriminimit mes gazetarëve me badge të institucioneve të kontrolluara nga qeveria si RTSH e ATSH me gazetarët të mediave të tjera, është një tjetër dhunim në dëm të lirisë së informimit. Kuvendi e Shqipërisë e ka për detyrë të krijojë kushte të barabarta për pubnën e të tërë gazetyarëve, e jo t’i trajtojë disa si të nënës e të tjerë si të njerkës.

KSHM i kërkon Kuvendit të Shqipërisë ta tërheqë këtë rregullore që nuk bën gjë tjetër veçse ul dhe më shumë standartet e lirisë së medias.

KSHM reagon me shumë shqetësim ndaj zhvillimeve të fundit ku prokuroria ka kërkuar sekuestrimin e serverit të Lapsi.al.

Standartet etike të gazetarisë përcaktojnë se një gazetar ka të drejtë dhe detyrë të mbrojë burimin e vet, të mos e vërë në rrezik dhe të mos e dekonspirojë atë. Investigimet bëhen për të ekspozuar problematika të ndryshme dhe detyra e prokurorisë është të ndjekë burimin e problemeve të investiguara, jo gazetarët që e investigojnë dhe burimet e tyre konfidenciale.

Për më tepër, sekuestrimi i serverit të medias Lapsi.al vë në rrezik jo vetëm burimin e këtij investigimi por dhe gjithë burimet e investigimeve të mëparshme të LAPSI.AL, duke dekonspiruar të gjithë burimet konfidenciale të mëherëshme të kësaj medieje.

Pasoja indirekte e këtij veprimi të papërgjegjshëm nga ana e Prokurorisë është se do të shkaktojë një frikësim tek çdo person (whistleblower) që ka denoncuar dhe mund të denoncojë tek gazetarët në mënyrë konfidenciale abuzimet e pushtetit.

KSHM e konsideron këtë veprim të papërgjegjshëm të Prokurorisë si një cënim të drejtpërdrejtë të lirisë së medias dhe i kërkon, në emër edhe të reformës në drejtësi, të tërhiqet menjëherë nga ky veprim dhe të kthejë mbrapsht të paprekura të gjitha objektet e sekuestruara.

KSHM i bën thirrje organizatave kombëtare e ndërkombëtare të gazetarëve, Këshillit të Europës, OSBE-së, Ambasadorit të BE-së, Ambasadores Amerikane dhe Ambasadave të tjera europiane në vend, të mbështesin këtë deklaratë të KSHM në mbrojtje të një prej shtyllave kryesore për funksionimin e  një shtypi të lirë.