Konferencë e përbashkët për shtyp mes Reporterëve pa Kufij (RSF) dhe KSHM

/in ,

RSF dhe Këshilli Shqiptar i Medias publikuan sot një plan politikash për të garantuar të drejtën për informim

Rekomandimet e Politikave — të përpunuara nga Reporterët pa Kufij (RSF), Këshilli Shqiptar i Medias dhe përfaqësues të tjerë të komunitetit të gazetarëve në Shqipëri — përqendrohen në forcimin e sigurisë së gazetarëve, mbrojtjen e pavarësisë së medias dhe mbështetjen afatgjatë të gazetarisë në Shqipëri, si vend kandidat për Bashkimin Europian (BE).

Në një konferencë për shtyp, më 19 nëntor, RSF dhe partneri i saj lokal, KSHM, prezantuan një plan të gjerë për të mbrojtur lirinë e shtypit dhe të drejtën për informim në Shqipëri, e cila renditet e 99-ta nga 180 vende në Indeksin Botëror të Lirisë së Shtypit 2024 të RSF-së — vendi me renditjen më të ulët në zonën e Ballkanit-BE.

Një plan për të garantuar të drejtën për informim në Shqipëri

Zgjidhjet e hartuara me partnerët tanë lokalë janë rezultat i një konsultimi të plotë me komunitetin e medias së pavarur shqiptare që nisi gjashtë muaj më parë. Rekomandimet synojnë të kontribuojnë në ‘Dialogun e Strukturuar për Lirinë e Medias’, një procedurë që do të ndihmojë Shqipërinë të plotësojë kushtet për anëtarësim në BE. Përpjekjet tona, të motivuara nga interesi publik dhe të bazuara në besim dhe transparencë, tregojnë se, edhe në një vend ku liria e shtypit sfidohet në të gjitha nivelet, veprimi i përbashkët dhe i vendosur është i mundur.”
Pavol Szalai
Kreu i Zyrës së RSF-së për BE-Ballkan

“Shqetësimet për gjendjen dhe besimin te media shqiptare po rriten, sidomos mes autoritarizmit dhe propagandës në rritje. Nuk ka një zgjidhje të thjeshtë, por pavarësia financiare për median është një pikënisje kyçe. Vetëm atëherë media mund t’i shërbejë vërtet interesit publik — jo interesave të korporatave, institucioneve, individëve të pasur apo edhe kriminelëve. Ky problem nuk është thjesht ‘problemi i tyre’; është problemi i të gjithëve.”
Koloreto Cukali
Kryetar i Këshillit Shqiptar të Medias

Rekomandimet janë të organizuara rreth tre objektivave kryesore:

  1. Forcimi i sigurisë së gazetarëve: Krijimi i një kuadri të fuqishëm ligjor për të kundërshtuar padi abuzive (SLAPP), për të rritur mbrojtjen e burimeve gazetareske dhe për të hartuar një Plan Kombëtar të Veprimit për Sigurinë e Gazetarëve (NAPSJ). Këto masa do të sigurojnë mbrojtje dhe zgjidhje ligjore për gazetarët që përballen me kërcënime, abuzime ose survejim të panevojshëm.
  2. Mbrojtja e pavarësisë dhe pluralizmit të medias: Plani propozon detyrime ligjore për mediat për të mbështetur pavarësinë editoriale dhe transparencën e pronësisë. Masat specifike përfshijnë mbrojtje më të fortë për median publike shqiptare (RTSH) dhe detyrimin e kompanive mediatike për të zbuluar detaje mbi pronësinë për të shmangur konfliktet e interesit.
  3. Mbështetja e qëndrueshmërisë dhe besimit publik te media: RSF rekomandon stimuj ekonomikë për mediat që ndjekin standardet e gazetarisë së besueshme, si Nisma për Besimin në Gazetari (JTI). Masat shtesë përfshijnë promovimin e praktikave etike të reklamimit dhe inkurajimin e modeleve të abonimit dixhital për të forcuar pavarësinë e mediave nga presionet politike dhe korporative.

RSF dhe partneri i saj presin që këto rekomandime të integrohen në procesin e anëtarësimit të Shqipërisë në BE përmes “Dialogut të Strukturuar për Lirinë e Medias” të udhëhequr nga Dekani i Fakultetit të His-Fil, në Universitetin e Tiranës, z. Mark Marku.

SHËNIM: Ky tekst u përkthye me ndihmën e ChatGPT

BIRN prezantoi sot studimin mbi Shpërndarjen e Narrativave të Dezinformimit Kundër NATO-s dhe BE-së Nga Aktorë Kundërshtarë

/in

BIRN prezantoi sot në Librarinë Tirana Times studimin mbi “Shpërndarjen e Narrativave të Dezinformimit Kundër NATO-s dhe BE-së Nga Aktorë Kundërshtarë”.

Studimi u bazua në monitorimin e 36 mediave shqiptare për periudhën 15 maj 2023-15 maj 2024, dhe kaloi në “sitë” 196,597 artikuj në lidhje me BE /NATO, nga të cilët u përzgjodhën 15,177 artikuj.

Në konkluzionet kryesore rezulton që propaganda kundër NATO-s dhe BE-së, si institucione ekspansionistë dhe kundër lirisë së medias, është e pranishme në median shqiptare, kryesisht në artikuj pa emër autori, me tituj bombastikë, shpesh të pasaktë e me pretendime të paverfikuara.

Si përfundim i studimit, propaganda e aktorëve kundërshtarë ndaj NATO/BE është e pranishme, por për momentin nuk është shqetësuese, gjithsesi, duhet mbajtur në monitorim.

Studimi mund të gjendet, këtu, në faqen e www.Reporter.al

Këshilli Shqiptar i Medias pjesë e fushatës për lajmet e rreme

/in ,

Në maj të ketij viti nisi fushata në bashkëpunim me këshillat e rajonit për luftën kundër  lajmeve të rreme. 

Këshilli Shqiptar i Medias ishte pjesë e kësaj fushate së bashku me Kosovën, Malin e Zi, Maqedoninë e Veriut, Serbinë dhe Bosnje dhe Herzegovinë.

Në rrjetet sociale të KSHM-së, janë të publikuara 6 postime rreth fushatës, duke treguar rendësinë që ka e vërteta dhe se lajmet e rreme dhe gjuha e urrejtjes ndikojnë në jetën e secilit prej nesh. 

Fushata u mbështet nga  UNESCO-s në kuadër të projektit  “Building Trust in Media in South East Europe: Support to Journalism as a Public Good”.

Këshilli Shqiptar i Medias zhvillon trajnimin me gazetarë për etikënnë media dhe vetërregullimin

/in

Në datat 24 Nëntor deri në 14 Dhjetor, Këshilli Shqiptar I Medias organizoi pesë sesione trajnimi me gazetarë.

Trajnimi pati si qëllim forcimin e kapaciteteve të gazetarëve shqiptarë, për të punuar sipas standardeve ndërkombëtare të etikës së gazetarisë dhe njohjes së procesit të vetërregullimit në media. 

Pjesë e trajnimit ishin 10 gazetarë të cilët nën drejtimin  e trajnerëve z. Mark Marku dhe z. Dorian Matlija  dhe në mentorimin e znj. Rashela Shehu u njohën më nga afër me procesin e vetërregullimit si dhe me mënyrën se si zbatohet etika në raportime të ndryshme.

Gazetarët në fund të trajnimit prezantuan dhe diskutuan  artikujt e tyre.

 Trajnimi u organizua me mbështetjen e UNESCO-s në kuadër të projektit  “Building Trust in Media in South East Europe: Support to Journalism as a Public Good”.

Aleanca për Media Etike zhvillon takimin e saj vjetor

/in

Ditën e hënë, më datë 13 nëntor 2023 në ambientet e Hotel Rogner, në Tiranë u zhvillua mbledhja e vjetore e Aleancës për Media Etike,, me pjesëmarrjen e mediave anëtare.

Gjatë këtij takimi, Kryetari i Këshillit Shqiptar të Medias, z. Koloreto Cukali, informoi anëtarët e pranishëm në lidhje me punën vjetore të AME-s.
Pjesë e agjendës ishte edhe diskutimi i punës së Bordit të Etikës, ku i zgjodh edhe anëtari i ri i bordit me vendim unanim, gazetari Enton Abilekaj.
Bordi, i cili ka një mandat 2-vjeçar nga viti i kaluar, është i përbërë nga 5 anëtarë, me kryetar z. Mark Marku nga Departamenti i Gazetarisë në Universitetin e Tiranës, anëtar Av. Dorian Matlija, anëtar Lorin Kadiu nga Citizens Channel, anëtare Klodiana Kapo nga Faktoje si dhe anëtarin e ri z. Enton Abilekaj nga Dosja.al.


Bordi i Etikës së Aleancës do të vazhdojë të shqyrtojë ankesa të cilat vijnë nga çdo palë e interesuar e cila pretendon se i është shkelur e drejta nga shkeljet e Kodit të Etikës.

Sulmohet qendra Media Look. Dyshimet janë që sulmi ka prapavijë censure politike.

/in

Qendra MediaLook dhe portali www.medialook.al ka tre muaj që përballet me një seri sulmesh online, derisa me datë 30 qershor 2024 u mbyll edhe profili personal në Facebook i Drejtorit të Qendrës, Elvin Luku, nga ku menaxhoheshin postimet në llogarinë e MediaLook dhe Qendrës Shqiptare MediaLook në FB. Për fat, llogaritë e mediave u arrit të rikuperohen për shkak të administrimit të dyfishtë. Sipas z. Luku, “nëse nuk do të ishte ky dublikim edhe ato do të ishin mbyllur”. 
Në lidhje me situatën, Media Look publikoi një artikull shpjegues.

Arsyet e këtij sulmi është vështirë të faktohen, por dyshimet janë që permbajtja qe Media Look po postonte në këto rrjete dhe hulumtimi i radhës i mund të jenë arsyeja e vërtetë. Prej dt. 8 Qershor, në bashkëpunim dhe me Unionin e Gazetarëve, MediaLook po zhvillon nje seri tryezash mbi Propagandën, dezinformimin dhe peizazhin mediatik në vend.  

E njëjta përmbajtje është rishpërndarë edhe në faqen e administratorit, e cila datonte prej vitit 2008, të mbyllur nga facebook (të paktën deri në përditësimin e fundit të datës 30 qershor), me argumentin se “jane dhunuar standardet e komunitetit”. Media look konfirmon që nuk është përdorur asnjë imazh apo video që ka pronësi intelektuale.

Ndër të tjera, në diskutimet e zhvilluara në Shkodër, Elbasan, Vlorë e Tiranë nga ana e MediaLook, fokusi ishte dhe hulumtimi mbi mënyrën sesi Bashkia Tiranë dikton kontentin e mediave: 

Bashkia e Tiranës “dikton” lajmet propagandistike në media, problem transparenca e llogaridhënia
Screenshot i lajmit të publikuar në faqen web të Media Look.

Gjithashtu, sipas njoftimit të Media Look, prej tre muajve është përballur me sulme dhe web-i i MediaLook. Këto sulme tentojnë që audiencën ta bëjnë ri-direct në faqe të tjera.

KSHM, shpreh shqetësim të madh për këtë situatë, që ka dyshime të forta se është e organizuar për të goditur një media me sfond censurimin e lajmit nga politika. Ky sulm i fundit, ri-vërteton edhe një herë akuzat e shumta të ngritura ndër vite që Facebook po përdoret përmes mjetesh e formash okulte, për të censuruar lirinë e fjalës në shqip.

Workshop: “Të drejtat dhe përgjegjësitë e gazetarëve”

/in

Njoftim për media

Tiranë, 25 Shkurt 2021-

Këshilli Shqiptar i Medias organizoi workshop-in në platformën Zoom “Mbrojtja e gazetarëve -Të drejtat dhe përgjegjësitë në ushtrimin e profesionit”.

Ky aktivitet u realizua me mbështetjen e Këshillit të Europës në kuadër të programit JUFREX , që synon të promovojë lirinë e shprehjes dhe lirinë e medias në Shqipëri në përputhje me standardet e Këshillit të Evropës.

Workshop i zhvilluar në Zoom “Të drejtat dhe përgjegjësitë e gazetarëve”

Qëllimi i këtij workshopi ishte njohja  e gazetarëve të rinj me standardet në mbrojtje të profesionit por edhe detyrimet që i rrjedhin në ushtrimin e tij.

Drejtorit ekzekutiv i Politiko.al,  Alfred Lela, i cili moderoi panelin e ekspertëve e cilësoi mbrojtjen e gazetarëve si sfidë të dyanshme ‘nga njëra anë standardet që duhen mbrojtur pavarësisht vështirësive dhe, nga ana tjetër ne si komunitet përballë faktorëve të tjerë’.

Në panel morën pjesë ekspertë ndërkombëtarë dhe lokal nga fusha e gazetarisë dhe jurisprudencës  ndërsa u ndoq nga gazetarë të rinj.

  1. Koloreto Cukali, Drejtori Ekzekutiv i Këshillit Shqiptar të Medias tha se ‘për çështje të etikës shpresën e kam tek gazetaret e rinj pasi një pjesë e gazetarëve të vjetër i janë futur shumë thellë kompromiseve të profesionit. Ai iu drejtua pjesëmarrësve duke i thënë se ‘Nga puna e bërë me trajnimet jemi shumë entuziast që një pjesë prej jush do të ndihmojë për të ngritur sa më shumë profesionin në të ardhmen”.

Këshilltarja ligjore pranë Qendrës Europiane për Lirinë e Shtypit dhe Medias, Flutura Kusari tha se sipas raporteve rreziqet qe i kanosen gazetareve janë të shumëansheme dhe përdoren si  mjet për t’i frikësuar dhe hutuar gazetarët që të mos e bëjnë punën e tyre ‘Efektet e kërcënimeve janë frenuese dhe nuk lejon kryerjen e një gazetarie të mirëfilltë’. Sipas Kusarit, ne nivele të larta është edhe dhuna ndaj grave që sipas një raporti të 2020  është fizike, politike a akoma më shumë on line. Presioni anonim online krijon një ambient të pasigurtë.

Këshilltarja ligjore pranë Qendrës Europiane për Lirinë e Shtypit dhe Medias, Flutura Kusari gjatë prezantimit të saj

Shteti është garantuesi kryesor i të drejtës së profesionit. Siaps Kusarit ‘nëse për arsye të ndryshme Shteti nuk u frikësohet mekanizmave kombëtare të mbrojtjes së gazetarëve, qëndrimi i tyre ndryshon kur u tërhiqet vëmendja nga mekanizmat ndërkombëtarë’.

Kusari përfundoi duke thënë ‘nëse duam që të kemi një mbrojtje më efikase duhet që të ketë dokumentim të rasteve dhe ndihmë nga mekanizmat dhe platformat e huaja’.

Drejtori ekzekutiv i Res Publica Dorian Matlija i cili ka mbrojtur përpara gjykatës shumë çështje të gazetarëve tha se ‘gazetarët duhet t’i njohin të drejtat dhe detyrimet në mënyrë që të kenë konfidencë të mjaftueshme për të përballuar kërcënimet pasi në momentin e parë që marrin një padi krijohet efekti i intimidimit’.

Sipas Matlisë, ‘kur një gazetar bën përpjekje duke respektuar parimet e Kodit të Etikës, tregon që qëllimi i tij është informimi i publikut, jo shpifja dhe gjykata mban anën e gazetarit edhe nëse ky i fundit  ka një informacion jo të saktë në raportimin e tij’.

‘Fushatat shpifëse ndaj gazetarëve janë instrumenti më i mirë i padive. Padia është një proces që zgjat shumë po dhe nxjerr të vërtetën në fund’ përfundoi ai

Për të ndarë eksperiencën e tyre të kërcënimet për shkak të profesionit të pranishëm ishin dhe  gazetari Artan Rama dhe Alice Taylor.

Rama këshilloi gazetarët që nëse duan të zgjedhin që të punojnë shkrime investiguese në momentin e parë që rrezikohen nga kërcënimet apo sulmet nuk duhet të zgjedhin zhurmën si mënyrën më të mirë për tu mbrojtur pasi kështu vështirësojnë punën e tyre.“Të gjithë që zgjidhni gazetarinë investigative do të rrezikoheni të paktën një herë që të përfundoni si të paditur në Gjykatë’ tha ai.

Ndërsa Gazetarja e Exit.al, Alice Taylor, ndaj të cilës dy vjet më parë nisi një fushatë sulmi mediatik duke e akuzuar si ‘spiune ruse’  komentoi se sulmi nisi pas një interviste  për Russia Today dhe se e gjithë situata ndodhi në një kohë që ajo po përjetonte shtatzëninë e saj ‘Krizat e forta të ankthit që më pasuan nga kërcënimet e shumta në rrjetet e mia sociale krijuan një situatë të rrezikshme e cila mund të rezultonte fatale për mua apo vajzën time’ tha Taylor.

Alice i këshillon gazetarët që në punën e tyre, pavarësisht se mund të jenë të detyruar të bëjnë shkrime kundër një personi apo gazetari tjetër duhet të tregohen të kujdesshëm pasi informacion që ata publikojnë mund të krijojë pasoja negative tek individët për të cilët kanë shkruar.

Ky është aktiviteti i dytë në serinë e takimeve me profesionistë të medias që realizohen në kuadër të programit JUFREX.

KSHM mori pjesë në diskutimin mbi qëndrushmërinë e shërbimit nukjevetëm.al

/in

Këtë të enjte Këshilli i Medias u ftua të merrte pjesë në tryezën e rrumbullakët e organizuar nga Fondacioni Together Albania  me mbështetjen e Ambasadës së Mbretërisë së Bashkuar. Në tryezën e zhvilluar u diskutua mbi veprimet e mundshme të qëndrueshmërisë për platformën eCounselling www.nukjevetem.al si ofruesi i platformës së parë në internet për shëndetit mendor në Shqipëri, e themeluar në vitin 2015, e cila ka siguruar gjithnjë e më shumë mbështetje të shëndetit mendor për mijëra të rinj dhe të rritur shqiptarë.

Platforma ka ardhur duke iu përshtatur kërkesës në rritje, në përgjigje të plotësimit të nevojave për mbështetje të përdoruesve të saj. Një element kryesor për suksesin e këtij modeli është disponueshmëria e shërbimeve që mbështesin individë të prekur, veçanërisht ata që përballen me shumë pengesa në shërbimet e mbështetjes së shëndetit mendor. Ky ishte rasti gjatë vitit të kaluar i dominuar nga pandemia Covid-19 kur kërkesat për mbështetje të shëndetit mendor në www.nukjevetem.al arritën kulmin.

https://www.nukjevetem.al/

Qëllimi i takimit ishte prezantimi i shkurtër i veprimtarisë dhe gjetjeve të platformës, duke u përqendruar në periudhën pandemike Covid-19. Pjesëmarrësit paraqitën shkurtimisht çështje për përfitimet e platformës për përfituesit (të rinjtë, të rriturit, prindërit dhe grupet e tjera të prekshme) si dhe palët e interesuara të qeverisë dhe shoqërisë civile, duke paraqitur perspektiva të ndryshme se pse dhe si është www.nukjevetem.al e dobishme dhe relevante.

Më tej, kjo tryezë e rrumbullakët qe një mundësi e shkëlqyer për të filluar procesin e nxitjes së marrëdhënieve të reja midis platformës dhe aktorëve përkatës, duke diskutuar mundësinë e partneriteteve në të ardhmen dhe zhvillimin e një vizioni të përbashkët për rolet dhe përgjegjësitë e ofrimit të shërbimit të shëndetit mendor për të rinjtë shqiptarë.

 

KSHM/ Studim për standartet dhe cilësinë e informimit të qytetarëve në Shqipëri në periudhën COVID-19/in

Gazetarët shqiptarë gjatë periudhës së shpallur nga qeveria shqiptare nga 9 marsi deri me 31 maj 2020, përveç rreziqeve për jetën dhe vështirësive ekonomike u përballën me vështirësi që ndikuan në cilësinë, paanshmërinë dhe saktësinë e raportimit.

Studimi i organizuar nga Këshilli Shqiptar i Medias në bashkëpunim me Fondacionin Konrad Adenauer, kishte si objekt të monitoronte dhe analizonte cilësinë dhe standardet e informimit të mediave shqiptare përgjatë periudhës së pandemisë COVID-19. Mediat e zgjedhura për monitorim ishin kanalet kombëtare dhe kanalet kryesore me informacion të pandërprerë si dhe disa nga portalet kryesore. Pikërisht këto media  mbajtën edhe peshën kryesore të informimit të publikut gjatë pandemisë së koronavirusit.

U mblodhën të dhëna që na bënë të mundur të verifikonin kapacitetin e saj për të prodhuar në kohën e COVID-19 përmbajtje të ndryshme nga ato që prodhojnë burimet zyrtare si insitucionet qeveritare dhe publike, aftësinë për t’i verifikuar burimet zyrtare dhe ballafaqimin e tyre me burime alternative, saktësinë e informacionit të prodhuar nga kanalet televizive, pavarësinë ose varësinë e këtyre mediave nga politika, etj.

Nga të dhënat e mbledhura janë analizuar  gjithashtu edhe dy dukuri shumë të diskutuara për median shqiptare (të pranishme edhe para pandemisë).

E para, problemi i shndërrimit të mediave shqiptare në riprodhuese të përmbajtjeve të emetuara nga zyrat e PR-it të kryeministrit, të partive politike dhe institucioneve.

Nga ana tjetër, përmes të dhënave të nxjerra nga monitorimi krijohet edhe një përceptim për marrëdhënien e mediave tradicionale apo të reja me mediat sociale, marrëdhënie që e ka transformuar totalisht marrëdhënien e qytetarit modern me median.

Problemi ishte të dalloje dukuritë normale mediatike në një gjendje anormale, pra dukuritë mediatike universalisht të shfaqura në të gjitha sistemet demokratike gjatë pandemisë, nga dukuritë specifikisht shqiptare, domethënë përpjekjet që u bënë në sistemet demokratike hibride për t’i përdorur sistemet mediatike në funksion të kontrollit të informacionit nga ana e qeverive dhe në rastet më ekstreme të përdorimit të mediave për manipulimin e opinionit publik.

Lajmi si gjini informative qëndron në disa themele si paanshmëria, saktësia, ndershmëria. Pikërisht këto standarte të gazetarisë u goditën rëndë gjatë pandemisë së COVID-19. Për të lexuar studimin e plotë kliko Raport studimor Mediat dhe informimi i qytetarëve në kohën e koronavirusit.

*Studim për standartet dhe cilësinë e informimit të qytetarëve në Shqipëri në periudhën 9 mars – 31 Maj 2020, nga kanalet televizive të vendit dhe portalet kryesore shqiptare në Web realizuar nga Këshilli Shqiptar i Medias, në bashkëpunim me Fondacionin Konrad Adenauer, Shqipëri.

Drejtues shkencorë dhe hartues të raportit përfundimtar: Prof. Assoc. Dr. Mark Marku Prof. Dr. Akademik Artan Fuga

Grupi i monitorimit: Lorena Memo, Klaudia Muçollari, Enxhi Sula

Viti 2020 ka qenë një vit sfidues për gazetarët në Shqipëri

/in

Nga Loneta Progni

Viti 2020 ka qenë një vit sfidues për gazetarët në Shqipëri, që përveç pandemisë janë përballur edhe me sulme të formave të ndryshme. Fillimisht, kundrejt gazetarëve janë përdorur një varg fjalësh ofenduese nga vetë kryeministri Edi Rama, si: kazanë, kadrinj, derra, zuzarë, të palexuar, dembelë, gënjeshtarë, parazitë, etj. Drejtëpërdrejtë janë sulmuar të paktën 12 gazetarë, me shoqërime në komisariat në momentin që ishin duke kryer punën e tyre, janë dhunuar, iu kanë sulmuar banësat apo automjetet, etj. Ngjarje këto që kanë nxitur edhe reagime ndërkombëtare nga Reporterët pa Kufij, Mapping Media Freedom, Instituti Ndërkombëtar i Shtypit, etj.

Organizata të ndryshme ndërkombëtare e kanë kritikuar shumë Shqipërinë gjatë viteve të fundit, lidhur me lirinë e medias dhe marrëdhëniet e autoriteteve në raport me gazetarët. Më poshtë po sjellim në vëmendje gazetarët që janë ndaluar, sulmuar, dhunuar gjatë vitit që lamë pas.

Mbrëmjen e 10 dhjetorit, në ditën e dytë të protestave pas vrasjes së 25-vjeçarit Klodian Rasha nga efektivi i Shqiponjave, gazetari i Ora News, Xhoi Malësia është ndaluar nga policia ndërkohë që ishte në transmetim live. Gazetari ka denoncuar edhe dhunën e ushtruar ndaj tij në komisariat. “Reporterët pa Kufij” lidhur me këtë rast bënë thirrje për hetim të pavarur të sjelljes abuzive të policisë.

“Ndjesia e ndalimit për mua ishte eksperiencë e paprecedentë, qoftë si gazetar apo njeri i thjeshtë. Ishte një gabim i madh në të gjitha aspektet e mundshme procedurale; një veprim tejet i rëndë në qasjen e të drejtave dhe lirive themelore.

Çështja ime po përfaqësohet nga Komiteti Shqiptar i Helsinkit. Aktualisht por përballemi në disa “fronte” të drejtësisë. Së pari, kemi bërë një kallëzim penal në Prokurorinë e Tiranës, ku pretendojmë se gjatë gjithë incidentit janë konsumuar disa vepra penale. Ndër më kryesoret “shpërdorimi i detyrës” dhe “heqja ose pengimi i paligjshëm i lirisë”. Së dyti, po përballemi në nivel administrativ pranë Shërbimit për Çështjet e Brendshme dhe Ankesave (ShÇBA) pranë Policisë së Shtetit. Aty pretendojmë për shkelje procedurale nga efektivët e policisë. Dhe së treti, pas konkludimit të këtyre dy hapave, do të ngremë një padi civile ku do të pretendojmë për dëm civil dhe moral. Hapi i katërt, nëse drejtësia jonë nuk do të japë një përgjigje që ne e konsiderojmë të nevojshme, do të jetë padia në Gjykatën Europiane për të Drejtat e Njeriut (Gjykata e Strasburgut). Ky institucion ka trajtuar raste të ngjashme dhe ka precedent të mjaftueshëm për trajtimin e çështjes sime.”, shprehet Malësia.

Një tjetër akt dhune gjatë protestave të dhjetorit u krye nga policia ndaj gazetarit dhe kryeredaktorit të gazetës Koha Jonë, Qamil Xhani. Agresioni ndaj Xhanit është bërë, ndërsa ai po bënte punën e tij si gazetar fare pranë redaksisë së tij. Arrestimi, prangosja e keqtrajtimi i Xhanit është dënuar edhe nga Këshilli Shqiptar i Medias si një sinjal shqetësues që policia tashmë nuk respekton asnjë standard demokratik, ku ai bazë, është lejimi i raportimit të lirë nga terreni dhe mos-ngacmimi i gazetarëve në krye të detyrës.

Mëngjesi i datës 30 tetor 2020 shënoi një tjetër ngjarje tronditëse, pasi një sasi lëndë plasëse shpërtheu në portën e oborrit të shtëpisë së gazetarit të Neës 24 në Lezhë, Elidon Ndreka. Fatmirësisht nuk ka pasur persona të lënduar, por vetëm dëme materiale. Ndreka e lidh ngjarjen me detyrën që ushtron prej vitesh si gazetar terreni, pasi thekson se ai dhe familjarët nuk kanë konflikte personale.

Më 14 gusht 2020, Ora Neës publikon mesazhet, që sipas tyre, ishin dërguar në telefonin e presidentit të “Yldon Media Group”, Ylli Ndroqi nga kryebashkiaku Erion Veliaj. Ajo që bie në sy në këto mesazhe janë ofendimet dhe kërcënimet e vazhdueshme për gazetaren dhe drejtoreshën e atëhershme të informacionit në këtë televizion, Beti Njuma. “Nuk ia fal asaj, këtu do jemi.” “Unë bashkëpunoj me ty, jo me atë idioten që ke marrë.” “Lejove një hajvane të futej mes nesh.” “Shumë kurajo paska.” Këto janë vetëm disa nga mesazhet ku shfaqej emri i gazetarës, e ndër të tjera bëhej presion për të ndryshuar linjën editorial.

Më 17 qershor 2020, gazetari i Report TV, Elvis Hila është shoqëruar nga policia në momentin që ishte duke raportuar për aksionin e IKMT në Shëngjin, ku u prishën disa ndërtime pa leje. Gazetari denoncoi se shefi i Rendit në komisariatin e policisë Lezhë, Agron Qullhaje i ka marrë telefonin dhe policët e kanë shoqëruar me forcë në komisariat. Sipas Hilës, shefi i rendit Agron Qullhaje i ka kontrolluar telefonin gazetarit, duke cënuar privatësinë e tij.

17 maji 2020, pas shembjes së Teatrit Kombëtar, shënoi dhe një tjetër moment i cili ngjalli reagime të shumta në Shqipëri dhe jashtë saj: dhuna ndaj gazetarit Alfred Lela. Videot që qarkulluan në mediat tradicionale dhe ato online treguan qartë dhunimin dhe shoqërimin e gazetarit.

‘Mapping Media Freedom’ që ka më fokur kufizimet, kërcënimet dhe shkeljet që prekin profesionistët e mediave në Europë, ndërsa ata bëjnë punën e tyre, ka pasqyruar arrestimin e drejtuesit të Politiko.al, Alfred Lela gjatë protestës kundër prishjes së Teatrit Kombëtar. Përmes këtij reagimi dënoi arrestimin dhe bëri thirrje për falje publike. Reagime të ngjashme postuan edhe Instituti Ndërkombëtar i Shtypit dhe shumë organizata kombëtare dhe ndërkombëtare. Nga ana tjetër, kryeministri Edi Rama mohoi publikisht dhunën e ushtruar nga policia ndaj gazetarit.

Pas shembjes së Teatrit Kombëtar u regjistruan episode dhune dhe ofendimesh edhe ndaj reporterëve dhe operatorëve në terren, mes të cilëve edhe operatori Mirsald Hajdarmataj i Report TV, i cili u godit dhe fye rëndë prej policëve.

Më 25 prill 2020, efektivi i rrugores që më pas u pezullua nga detyra Anxhelo Bardhi, i shoqëruar nga një i shok i tij, dhunoi gazetarin e Fierit Xhoen Osmënaj, duke i dëmtuar edhe makinën.

10 marsi 2020 shënoi një tjetër shoqërim arbitrar për në komisariat nga ana e policisë ndaj gazetarit të Fax News Bekim Bici. Qendra europiane për lirinë e shtypit dhe të medias reagoi për shoqërimin e paligjshëm të gazetarit Bekim Bici, duke kërkuar sqarime nga autoritetet shqiptare. Po ashtu edhe Instituti Ndërkombëtar i Medias me qendër në Vjene iu bashkua këtij reagimi. Ndërsa më 14 janar 2020 është sulmuar qëllimisht makina e gazetarit të Lezhës, Gjergj Figuri.

A do të jetë viti 2021 fundi i pandemisë dhe gjithashtu i cënimit të lirisë së fjalës?